Жаргалан

Одоогоос 13 жилийн өмнө дунд сургуулийн 4-р ангид ордог жилээ анх би найзтайгаа танилцсан юм. Аавынхаа гараас хөтөлсөөр орж ирсэн тэр жаалын ув улаан хацрыг харахад хөдөөнөөс дөнгөж саяхан орж ирсэн болов уу гэж бодогдуулахаар байв. Тэгээд хичээл тарсны дараа харих замд нөгөө хүү чинь замын урд алхаад байхаар нь гүйцэж очоод ярилцаж гарав аа. Хаана амьдардаг, ээж аав нь юу хийдэг, хэзээ энд нүүж ирсэн гээд түм буман асуултаар харилцан цохилт хийсээр эцсийн үр дүнд өдөр хамт харьж байхаар тохирлоо. Тухайн үед нэг зүг рүү ганцаараа явдаг байсан надад энэ нь туйлын том завшаан байв. Энэ өдрөөс эхлэн бид хоёрын насан туршын нөхөрлөл эхэлсэн юм.

Би амьдралынхаа хамгийн дурсамжтай адал явдалтай хэсгүүдийг ярих болоход дандаа Тогтохоо бид хоёр явж байгаад гэж эхэлдэг. Бүтэлгүй дурлалын шаналал, элсэлтийн шалгалт, ажилд орсон анхны өдөр гээд эргэн дурсахад баяр хөөртэй, гунигтай бүхий л мөчүүдийг бид хамтдаа үдсэн юм. Хүн амьдралдаа сайхан гэр бүл, сайн найзууд, хүссэн ажлаа хийх гэсэн гурван гол зүйлийг бий болгосон байх ёстой гэж найз маань ярьдаг байв. Энэ зорилгодоо хүрэхийн тулд өөрийн авьяас чадварыг бүрэн дайчилж, олдсон цаг хугацааг оновчтой ашигласан хүний тод жишээ бол тэр юм. Багаасаа өөрийн овсгоо самбаагаар бусдаас ялгарч сурагч насандаа өөрийн аавын эхлүүлсэн ном бүтээх, хэвлүүлэх ажлыг бие даан явуулж жаахан хүүхдэд баймааргүй бизнес сэтгэлгээг гаргаж байсан нь бахархууштай санагддаг. Эргээд бодоход түүний хэвлүүлсэн геометрийн сургалтын материал, элсэлтийн шалгалтанд бэлтгэх гарын авлага олон ч сурагчдад мэргэжлээ зөв сонгох болоод эрдэм мэдлэгээ ахиулахад нь үлэмж хэмжээний тус болжээ. Хэн нэгэнд тусламж хэрэгтэй цагт ямар ч тохиолдолд бэлэн байж сэтгэлээсээ ханддаг чанар нь өөр шигээ олон арван сайн найзуудаар өөрийн эрхгүй хүрээлүүлэхэд хүргэсэн билээ.

Ямар хүнтэй найзалдагаа яривал, чамайг хэн гэдгийг хэлье гэсэн үг байдаг. Бид өөрийгөө юу гэж ярьдаг, яаж тодорхойлдогоос илүүтэйгээр хэнтэй нөхөрлөж байгаагаар хэн гэдгийг маань хялбархан тодорхойлж болно. Бахархах найзтай байна гэдэг хөрөнгө зоорь хураахаас илүү аз завшаан амьдралаас авч байгаа хамгийн том бэлэг юм. Найзынхаа хийсэн үйлдэл, хэлсэн үгийг бусдад бахархал дүүрэн танилцуулж суух нь хамгийн том аз жаргалын нэг. Бид энэ сэтгэлийн цэнгэлийг Тогтохоогийн хүчээр олон удаа мэдэрчээ. Миний хамгийн сайн найзыг Тогтохоо гэдэг, тэр бол миний мэдэх хамгийн сайн залуу гэж өөрийн үгээ эхлэхэд намайг хүн магтаж байгаа юм шиг л би тийм их баяр хөөрийг мэдэрч мэдэрсээр байна. Найзад маань хэдэн цагаар магтаж ярихад хүрэлцэхүйц тийм их сайн чанар, гайхалтай амжилтууд байсан юм. Ирээд буцдаг хорвоод хорин хоёрхон жил үдэлсэн ч зарим хүний насан туршдаа хийж чадах зүйлээс илүүд хүрч гэр бүл болоод олон арван найзуудынхаа хүндлэлийг хүлээж чадсан түүн шиг хүн ховор. Бидний зүрх сэтгэлд хамгийн том байр суурь эзэлсэн, эзэлсээр байх найзыгаа үүрд дурсан санаж явах болно.