"Бид Үүрдийн Найзууд" сайн үйлсийн аяны сэтгэгдэл

Сайн уу бүгдэнд нь амралтын өдрийн мэнд

Юуны өмнө энэхүү сайн үйлсийн аянд урьсан найзууддаа маш их баярлалаа. Өнөөдрийн асрамжийн газар очсон сэтгэгдлээ тэр үйл ажиллагаанд биеээр очиж оролцоогүй ч сэтгэл зүрхээрээ хамт байсан групынхээ найз нартаа зориулаад бичихээр шийдлээ.

Тэр хүүхдүүд үнэхээр хөөрхөн юмаа.

Асрамжийн газар нь 11-р хороололд байрлах хуучний 3 өрөө байрладаг бөгөөд ороход тавчуухан яаж 18 хүүхэд багтаж амьдардаг байна гэмээр санагдаж байлаа. Бас болоогүй тэрхүү байрыг сарын 800 мянгаар түрээслэдэг улсаас сард 823 мянган төгрөг өгдөг ер нь яаж зохицуулдаг юм болоо гэмээр санагдсан. Тэр асрамжийн газрын эгч үнэхээр буянтай, хүүхдэд хайртай сайхан эгч юм. Бид нарыг очиход том өрөөндөө гоё хувцасаа өмссөн хөөрхөн жаахан хүүхдүүд маань бүгд томоотой суусан (хамгийн бага 3 настай сэргэлэн хүүг эс тооцвол хэхэ) хүлээж байлаа. Асрамжийн газрын эгч асрамжийн газрын үйл ажиллагааны талаар ярьж, бидний үйл ажиллагаанд оролцсон бүх хүмүүст талархаснаа илэрхийлсэн. Үүний дараа манайхныг төлөөлж Жаргалан найз маань “Энэхүү үйл ажиллагааны нэгтгэлийн гол үндэс нь талийгч найз Тогтохцэрэн юм” (гэсэн үг их сэтгэлд хүрсэн шүү) гэж дүү нартаа хэлсэнээр өнөөдрийн үйл ажиллагаа эхэлсэн юм.

Хүүхдүүд маань ямар ч их авьяаслаг бас царайлаг юм. Бидэнд бүжиг, дуу, шүлэг гээд чаддаг бүхий л зүйлүүдээ үзүүлсэн юм. Аан бас уул нь хийл тоглодог 3 хүүхэд байгаа гэсэн даанч хийлээ хөгөлж чадаагүй болохоор тоглох боломжгүй гэсэн юм. Тэр хүүхдүүд маань бас болоогүй зарим нь ятга, ёочин гээд үндэснийхээ хөгжмүүдийг тоглож сурч байгаа гэсэн шүү.  Тэд нар маань үндэсний хөгжмийн хамтлаг бус бүр ассамбель байгуулна гэж ярьдаг гэсэн шүү. Одоо асрамжийн газрын хүүхдүүдийн дундах “Яргуй” урлагын наадамд бэлдэж байгаа юм байналээ.

Хүүхдүүд маань бүтэн өнчин хэдий ч хүүхдүүдийн маань царайнд гунигласан сэтгэл нэгээхэн ч үгүй харин ч бүгд баясалтай сэтгэл хангалуун байгаа харагдсан.  Бас болоогүй бага насны жаахан дүү нараа  насаар арай том эгч, ах нар нь асарч эрхлүүлж, хувцасыг нь янзалж өгч байгааг хараад үнэхээр хөөрхөн санагдсан. Хүүхдийн сэтгэл гэж цагаахан ариухан юм.

Хүүхдүүд маань тоглолтынхоо төгсгөлд Ээжийн тухай дуу бидэнд дуулж өгсөн юм. Бидний зарим нэг найз нар маань тэсгэлгүй уйлж хүүхдүүдийн сэтгэл ч хөдөлж дуулангаа зарим нь уйлж, дууг дуусах хэсэг хором сэтгэл эмзэглүүлсэн үйл явдал бож өнгөрсөн.

Үүний дараа манай группынхны бэлдсэн бэлэг, ном, хувцас гээд зүйлсүүдээ гардуулж өгсөнд хүүхдүүд үнэхээр их баярлаж байлаа. Ялангуяа 88 ширхэг номнуудаа өгөхөд хүүхдүүд маань “хөөх ямар гоё ном бэ, би энийг уншина, энийг уншиж үзээгүй гээд л зарим нь шууд дэлгэж үзээд л хоорондоо ярилцаад л” жаахан дүү нар маань номыг ингэж сонирхож, баярлаж байгааг харахад өөрийн эрхгүй бахархах сэтгэл төрж байлаа.

Асрамжийн газрын эгч маань тэдгээр хүүхдүүдийг бүгдийг нь сургуульд сургадаг бөгөөд бас болоогүй нэг ч хүүхэд хорхойтой шүд байхгүй, аль болох эрүүл мэндэд тустай, кальци амин дэмтэй хоолоор хооллохыг боддог, эрүүл мэндэд нь анхаарал тавьж чаддаг, нэг ч удаа гар хүрч зодож үзээгүй зөвхөн харцаараа хөдөлгөхийг боддог их сайхан зөөлөн эгч байна лээ. Саяхан тэдний 2 жаахан охин зурхний хүнд хагалгаанд орсон бөгөөд нэг нь ар далаа, нөгөөх нь цээжийн хэсгээсээ... (азтай нь Монголд эмчлэгдэх боломжтой юмдаа). Хагалгааны төлбөр гэж нэг нь 700-800 мянга гэж сонсогдсон шүү.

Ийм сайхан үйл ажиллагаанд оролцсондоо миний хувьд их азтай хэрэг юм. Хүнд туслах боломж гарч ирнэ гэдэг өөрөө их буян заяа гэж би боддог . Эцэст нь хэлэхэд үйл ажиллагааг санаачилсан, дэмжсэн бүх хүмүүс, найз нартай маш их баярлалаа. Талийгч найз маань биднийг нэгтгэж ийм сайхан үйл хэргийг эхлүүлэх эхлэлийг тавиулсан сайхан найз нөхөдтэй буянтай хүн юм. Та бүгдийн маань буян заяа дэлгэрэх болтугай!

Интернэтэд тавигдсан мэдээ

www.24tsag.mn сайтын сэтгүүлч Д.Идэр бидний хэрэгжүүлж буй "Сайн үйлсийн аян"-ы талаар мэдээ бичжээ. Зарим нэг андуурсан зүйлсийг залруулаад доор орууллаа.

Эерэг 24: Тусалж буян үйлддэг залуус

Хайртай дотны найзаа алдсан залуус түүнийхээ араас ихэд харуусчээ. Гэхдээ тэд баар, ресторанд цуглаж гуньсан сэтгэлээ хатуу дарсаар тайтгаруулсангүй. Харин найзыгаа хүндэтгэн буян үйлдэхээр шийджээ. Ингэхдээ үдэш бүр залбирч ч юм уу, талбай дээр цугларч гэрэлт зул өргөхийг илүүд үзсэнгүй. Оронд нь хайр халамжаар дутаж яваа өнчин хүүхдүүдэд халуун дулаан сэтгэл ямар сайхныг мэдрүүлэхээр шийдсэн байна.  

  

Ц.Бямбацогт нэртэй Фэйсбүүк найз минь сайн үйлсийн аянд нь номоо хямдруулан худалдаалсан нэгэн зохиолчид талархал илэрхийлж бичсэнийг хараад би энэ залуусын ажлыг сонирхоход хүрсэн юм. Интернэтийн үл таних найз минь хүүхдүүдийг баярлуулахаар ном, хувцас гэх мэт хандив цуглуулж байгаа бололтой. Бичсэнийг нь уншвал хүний жаахан үрсийг баярлуулна гэхээс үнэхээр их хөөртэй яваа нь илт байв. Тиймээс түүний нөхдийн өрнүүлж буй ажлыг Монголын гэрэл гэгээтэй мэдээллийг түгээдэг “Эерэг 24” буландаа онцоллоо.

        Шийдэл: Залбирч биш тусалж буян үйлдэе

Ямар үйл ажиллагаа зохион байгуулж буй болон мэдээлэл өгөх боломжтой эсэхийг асуухад Ц.Бямбацогт ихэд таатай хариу өгч, намайг өөрсдийн “ажлын оффис”-тоо нэмэв. Ингээд би хүүхдүүдэд туслах аяны фэйсбүүк группт гишүүнээр орж тэднийг юу хийж, юу хүсч буйг дотроос нь мэдэрлээ.

Хийж бүтээх ид залуухан насандаа бурхан болсон дотны анд Ч.Тогтохцэрэнгийн дурсгалд зориулан найзууд нь “Бид үүрдийн найзууд” групп нээжээ. Энэ группдээ залуус найзынхаа араас буян хийх сайхан ажлаа ярилцана. Нэлээд хэлэлцсэний эцэст “эмзэг бүлгийн хүүхдүүдэд туслах, тэдэнд оюуны хөрөнгө оруулалт хийх” нь найзынхаа дурсгалыг хүндэтгэх хамгийн зөв шийдэл гэж санал нэгдсэн байна.

Энэ ажлаа хэрэгжүүлэхээр Улаанбаатар хотод үйл ажиллагаа явуулдаг хүүхдийн асрамжийн газруудыг судалсны үндсэн дээр гадны ямар нэгэн хөрөнгө оруулалтгүй, голчлон бүтэн өнчин хүүхдүүдийг хүмүүжүүлдэг, байр түрээслэн суудаг “Манай гэр” хүүхэд асрах газрыг сонгож туслахаар болжээ.

Монголын хамгийн эвтэй 76 гишүүн  

“Бид үүрдийн найзууд” групп 76 гишүүнтэй. Тэд бүгд зорьсон ажлаа амжилттай хэрэгжүүлэхийн төлөө чадах ядахаараа хичээнэ. Гэр бүл, бусад найз нөхөд, ажлын боломжоо ч үүндээ дайчилна. Харин надад энд нэг зүйлийг асуумаар санагдсан юм. Хааяа миний хэдхэн найз нийлээд нэг юм хийе гэхэд санал нийлэхгүй үе зөндөө байдаг. Тэгвэл зарим нь одоо хүртэл уулзаж амжаагүй яваа эдгээр залуус хэрхэн нэгдэж чадав? гэдэг асуулт сонирхол татаж байлаа.

Талийгч Ч.Тогтохцэрэнгийн найзууд кибер ертөнцөд цугларсан бөгөөд сураг сонссон нэгнээ нэмсээр үе үеийн найзууд нэгдэж чаджээ. Группт шинээр элссэн гишүүд сайн үйлсийн аяны тухай саналаа хуваалцахаас гадна тэднийг нэгтгэсэн нөхрийнхөө тухай сайхан дурсамжаа бичнэ.

Тухайлбал, Г.Энхцэцэг “Анх талийгчтай наймдугаар ангиа төгсөөд хоёулаа МУИС-ийн лицей сургуульд элсэж, математикийн ангид хамт сурч байлаа. Лицейдээ 2 жил, МУИС-ийн эдийн засгийн сургуульд 4 жил хамт сурсан. Арван жилд байхын л математик, геометрийн хичээлд дуртай, хичээл зүтгэлтэй, уйгагүй хүүхэд байсан. Ийм ч эрдэм шинжилгээний хурал, тийм ч уралдаан тэмцээнд оръё гээд намайг ятгах боловч би хайнгадуу залхуу нэгэн байлаа. 2008 оны төрсөн өдрөөр минь “Real Estate Principles” гээд том ном өгөөд заавал уншаарай гэж захиж билээ” хэмээн дурсжээ.  

Харин Г.Уянга гэдэг бүсгүй “Хамгийн анх Япон Монгол төвийн номын санг заалгаж танилцаж билээ. Ерөнхийдөө их олон зүйл дээр хамт байсан. Цуг анги сольж, Голомтийн тэтгэлэг, Ерөнхий сайдын тэтгэлэг, Бадараа агсны тэтгэлэг авч сургуулиа төгсөөд Хаан банкинд нэг хэсэг хамт ажиллаж байсан. Ийм сайхан үйл хэрэгт ялангуяа найзынхаа дурсгалд зориулсан хэрэгт оролцохдоо баяртай” байна хэмээн бичжээ.

Бас нэг нь “Нэг сургууль, нэг курс учраас эчнээ мэддэг байсан ч толгой сайтайгийн хажуугаар хамт олонч, нийтэч хүн гэдгийг нь нэг ангид суртлаа мэдээгүй явжээ. Тогтохоогийн хэлж байсан нэг зүйлийг би одоо ч гэсэн сайн санадаг. Өглөө ажилдаа, орой гэрлүүгээ яардаг хүн хамгийн жаргалтай” гэж хэлдэг байсан. Бас “Аз жаргалтай амьдрал гэж байдаггүй, харин аз жаргалтай хором мөчүүд гэж байдаг. Тэр хором мөч олон байх тусам хүний амьдрал жаргалтай байдаг” гэж нэгэн удаа хэлж байсан. Ер нь их олон зүйлийн талаар эргэцүүлж боддог, тэрийгээ бусадтай хуваалцах дуртай байжээ” хэмээн дурссан байлаа.

Тэд үнэхээр талийгчийн үүрдийн сайн найзууд байсан нь ингэж нэгтгэж чадсан байх гэсэн бодол төрлөө. Нөгөө талаас хүүхдүүдэд туслах буянтай ажил тэднийг үр дүнтэй ажиллахад нөлөөлсөн байж болох юм. Энэ үед манай УИХ-ын 76 гишүүн Монголын хүүхдүүдийг хөгжүүлэхийн төлөө эдэн шиг нэгдэж чаддаг болоосой хэмээн бодогдож байсныг нуух юун.

Бусдад буян үйлдэх нь сэтгэлийн их цэнгэл болдог

Залуус сар гаруйн хугацаанд хийсэн ажлаа дүгнэн өнгөрсөн ням гарагт “Манай гэр”-ийн хүүхдүүддээ хандивын эд зүйлсээ гардуулж өгсөн юм. Тодруулбал, 1.305.000 төгрөг цуглуулж үүгээрээ асрамжийн газрын хүүхдүүдийн хөгжилд хэрэгтэй, авах шаардлагатай олон зүйлийг худалдан авчээ.

“Баян” залуус ганц удаа шоудахдаа үрэх мөнгөөр үүрдийн найзуудын сүлжээ:

• Хүүхдийн шилмэл уран зохиолын ном -88ш
• Бичгийн хэрэгсэл -24ш
• Хүүхдийн хувцас -23ш
• Ор хөнжлийн давуу- 3ш
• Гутал, оймс -3ш
• Хүүхэд бүрт гарын бэлэг- 20ш
• Гэрэл зургийн цуглуулга -3ш
• Цэвэрлэгээний хэрэгсэл
• Витамин зэрэг зүйлсийг хүүхдүүдэд бэлэглэжээ.  

Тэд асрамжийн газрын хүүхдүүдэд нэг удаа туслаад орхихгүй бөгөөд "Миний гэр”-ийнхэнтэй цаашид холбоотой байж, хүүхдүүдэд тогтмол зөвлөгөө мэдээлэл өгөх, англи хэл заах, тэдний дунд уралдаан тэмцээн зохиох, эмч найз нараа дайчлан урьдчилан сэргийлэх үзлэг хийх, байгууллагуудтай холбогдож сургалтанд хамруулах, зусланд амраах зэрэг өөрсдийн зүгээс хийж чадах олон зүйлээрээ туслахаар урт жагсаалт гаргажээ.

Түүнчлэн, залуус аяныхаа тухай “Бидний тусалснаас илүүтэйгээр тэдгээр хүүхдүүд бидэнд маш их зүйлийг ойлгууллаа. Хариу нэхээгүй тус эзэндээ ямар их сэтгэлийн цэнгэл авчирдаг болохыг, хүүхдийн нүдэнд баяр баясгаланг гэрэлтүүлэх нь өөрөө юутай ч харьцуулашгүй ариун үйл гэдгийг мэдэрлээ” хэмээн ярьж байна.

Нөхдийнхөө хайрыг хүлээсэн Ч.Тогтохцэрэн

Анх аяны тухай лавлахад Ц.Бямбацогт найзынхаа тухай ингэж ярьсан юм. “Бид хүний хайлан болсон 22-хон настай, ид хийж бүтээхийн хүслээр гялалзаж явсан найзыгаа дөрвөн жилийн өмнө зуурдаар алдаад их харамсацгаасан юм аа. Тухайн үед найзынхаа дурсгалд зориулан номын сан байгуулах юмсан гэж ярилцаж байсан ч зарим нь шинэ ажилтан, зарим нь оюутан байсан тул хэрэгжүүлж амжаагүй. Гэхдээ тэр үед ярилцсан зүйлсээ марталгүй явсаар сарын өмнөөс аян болгоё гэж шийдсэн. Найзыгаа магтаж байна гэж битгий бодоорой, яг үнэндээ олон мянган хүнд нэг төрөх ухаантай, маш хөдөлмөрч хүн байсан юм. Олон бэрхшээлийг туулж 22 насандаа олон ч амжилт нэр алдарт хүрсэн дээ” хэмээв.  

Нээрээ ч Ч.Тогтохцэрэн үнэхээр хичээнгүй, манлайлагч нэгэн байсныг түүний тухай нөхдийнх нь дурсамжаас харж байлаа. Олон арван уралдаан, тэмцээнд амжилттай оролцож, тэтгэлэгүүдээр мялаалгаж явсан тэрээр нөгөө талаас хүний сайн анд нөхөр байжээ.

Та бүхэн аянтай холбоотой мэдээллийг эндээс авах боломжтой.

Эерэгээр холбоотой байя 24tsag.mn

Д.Идэр

“Бид Үүрдийн Найзууд” сайн үйлсийн аян

Анд найз Ч.Тогтохцэрэнгийнхээ дурсгалд зориулж зохион байгуулсан сайн үйлсийн аян маань нэг сарын турш үргэлжилсэний эцэст амжилттай болж өндөрлөлөө. Олон арван сайхан сэтгэлт хүмүүсийн дэмжлэг, хамтын зүтгэлийн үрээр “Манай Гэр” асрамжийн газрын 18 хүүхдэд инээд хөөр, баяр баясгаланг бид бүгдээрээ бэлэглэж чадлаа. Анх энэ аяныг эхлүүлж байхдаа хэдэн хүн хамрагдах бол, төлөвлөсөн хандиваа цуглуулдаг л байгаа гэсэн айдастай байснаа нуух юун. Гэвч сайн үйл, сайхан сэтгэл гэдэг өөрөө сүүн замтай байдаг болохоор өдөр ирэх бүр оролцох хүмүүсийн тоо хүрээгээ тэлж байсныг харахад үнэхээр бахархамаар байна.

Найзын маань үе үе андууд сайн үйлсийн төлөө нэгдэж, олуулаа байсан цагт юуг ч бүтээж болдог гэдгийг харуулсанд таатай байна. Хэдийгээр бидний найзыг огт танихгүй ч сайн үйлсийн аянд сэтгэлийн болоод эд материал, мөнгөн хандив өгсөн бүх хүмүүстээ маш их баярлалаа. Та бүхний хандив бяцхан дүү нарын мэдлэг оюуныг тэлэх уран зохиолын ботиуд, дулаан хувцас, зөөлөн ор хөнжлийн даавуу, хичээлийн хэрэгсэл болж очсоныг дуулгахад таатай байна. Гэхдээ бид тусалсан гэхээсээ илүүтэйгээр, тэдгээр хүүхдүүд бидэнд маш их зүйлийг ойлгуулсныг онцлох хэрэгтэй болов уу. Хариу нэхээгүй тус эзэндээ ямар их сэтгэлийн цэнгэл авчирдаг болохыг, хүүхдийн нүдэнд баяр баясгаланг гэрэлтүүлэх нь өөрөө юутай ч харьцуулашгүй ариун үйл гэдгийг мэдэрлээ.

Энэхүү аяныг анх санаачилж, "Манай Гэр" асрамжийн газартай бидний өмнөөс байнга холбогдож гүүр болж байсан Uyanga Uyanga CH-дээ нийт гишүүдийнхээ өмнөөс баярлалаа. Хэдийгээр далайн цаана алслагдаж, хол газар байгаа ч өдөр шөнийг үл ялган группээ идэвхитэй байлгаж, олон нийтийг шаргуу уриалж байсан Бямбацогт найздаа талархал илэрхийлье. Энэ ажил маань нэг өдөр болоод дууссан ч бэлтгэл ажилд багагүй хүч хөдөлмөр, цаг хугацаа орсон билээ. Зохион байгуулалтын ажилд чин сэтгэлээсээ оролцож, өөрсдийн цаг заваа зарцуулсан Ulziikhutag Su Ulziikhishig ByambabayarKhaliunaa Gantulga Magnai Tsagaandorj Norjmaa Ayurzana Nomin Damdin-нартаа баярлалаа. Арга хэмжээн дээр ирж дүү нартайгаа нэг өдрийг хамт өнгөрөөсөн Bayarmaa Unur-Erdene Uranzaya Battulga Энх-Амгалан Лхагвабаяр-нартаа талархсанаа илэрхийлмээр байна.

Эцэст нь хэлэхэд та бүхний тусламжгүйгээр энэ аян маань ийм амжилттай болохгүй байсан гэдгийг хэлмээр байна. Үүгээр энэхүү сайн үйлсийн аян өндөрлөхгүй бөгөөд цаашид илүү олон зүйлийг хийх урмыг өглөө. Дараа дараагийн ажлуудад та бүхнийг оролцоно байхаа гэдэгт итгэж байна.

Сайн үйлс дэлгэрэх болтугай.

Б.Өлзийхишиг

Одоогоос 7 жилийн өмнө буюу 2008 оны 11 дүгээр сарын 14-ний өдөр сурагчийн ширээнээс боссон цагаасаа хойш удаан уулзаагүй андтайгаа дахин уулзсанаар бидний хэсэг нөхдийн дотно нөхөрлөл эхэлсэн юм. Тэр өдөр "Голомт банкны тэтгэлэгт 100 шилдэг оюутан" арга хэмжээний хүлээн авалт дээр таних хүнгүй уйдаад сууж байтал яг ард “энэ манай 10 жилийн ангийн охин байна, тэтгэлэг авчихаад өөрөө ирээгүй юм байхдаа” гээд 2 залуу ярьж өгч байнаа. Нэг л танил хоолой сонсогдсон тул сонирхоод эргээд хартал сурагч насны минь найз сууж байдаг байгаа. Тэгээд л бид хоёрын дунд яриа өрнөж гарсандаа. Тогтохоо надад "Сайн байна, ёстой сайн байна" гэж урам өгөөд л би хөөрөөд л сууж байсан тэр мөчийг одоо ч санахад сайхан байдаг юм. Эргээд бодоход нилээд удаан уулзаагүй байж байгаад тэнд таарч, зөндөө их юм ярьсан хэрнээ холбоо барих утсаа ч солилцохгүйгээр салчихдаг бид ёстой л гэнэн, хүүхдээрээ байждээ.

Гэхдээ тохиолоор Төрийн ордонд болсон шилдэг оюутнуудын чуулга уулзалт дээр дахин таарсан юм. Тэр үеэс хойш Эдийн засгийн сургуулийн номын сан, тэр бор ширээнүүд дээр олон ч удаа хамт сууж, судалгааны ажил хэрхэн хийх талаар зөвлөгөө авч, их ч зүйлийг заалгасандаа. Харин би тэр бүгдийнх нь хариуд "баярлалаа" гэж олигтойхон хэлж чадаагүйдээ харамсдаг юм. Хэзээ ч, хэнд ч туслахад үргэлж бэлэн, жинхэнэ сэтгэлээрээ хүн байсан шүү анд минь.

Одоо санахад надад урам өгч, зөвлөж байсан үгс нь миний сэтгэлд хамгийн тод үлдэж дээ. Өөр олон сайхан дурсамж байгаа ч "яг нэг юм хоолой дээр тээглэчихээд гарахгүй байгаа юм шиг" бичих гэхээр нэг л эвлэхгүй байнаа. Гэхдээ юм нэгээр дуусахгүй, дараа илүү сайхан дурсамж бичнээ.

Өөр шигээ үнэ цэнэтэй, түшиг тулгуур болох олон сайхан найзууд үлдээгээд өөрөө бурханы оронруу явсан найзаараа үргэлж бахархаж явах болноо.

Тиймээ БИД ҮҮРДИЙН НАЙЗУУД.

Б.Өлзийхишиг

Сайн үйлсийн аян

Сайн байцгаана уу?

Бид эртнээс Тогтохоогийнхоо дурсгалд зориулж сайн үйл хийх юмсан, үгүй ядаж байнга дурсаж байх юмсан гэж ярилцсаар ирсэн ч энэ блогийг нээж цөөн хэдэн дурсамж бичсэнээс өөр тоймтой зүйл хийж амжилгүй явсаар өдийг хүрчээ.

Тиймээс ямар сайн үйл хийх талаар бидний хэсэг нөхөд нилээн удаа яриа өрнүүлсний үр дүнд "эмзэг бүлгийн хүүхдүүдэд туслах, тэдэнд оюуны хөрөнгө оруулалт хийх" нь найзынхаа дурсгалыг хүндэтгэх хамгийн зөв шийдэл гэж санал нэгдсэн юм.

Энэ ажлаа хэрэгжүүлэхээр Улаанбаатар хотод үйл ажиллагаа явуулдаг хүүхдийн асрамжийн газруудыг судалсны үндсэн дээр гадны ямар нэгэн хөрөнгө оруулалтгүй, голчлон бүтэн өнчин хүүхдүүдийг хүмүүжүүлдэг "Манай гэр" хүүхэд асрах газрыг сонгож, "Хүүхдийн шилмэл зохиолын эрдэнэсийн сан 108 боть" ном болон бичгийн хэрэгсэл, хүүхдийн оюун ухаан хөгжүүлэх тоглоом авч өгөх, цаашид тус газарт тогтмол туслах, хүүхдүүдтэй уулзалт хийж зөвлөгөө өгөх, Англи хэл заах, бяцхан уралдаан тэмцээн зохиох зэрэг ажлуудыг хийхээр төлөвлөөд байна.

Үүнийг бид найзынхаа дурсгалд зориулан сайн дураараа зохион байгуулж байгаа учраас энэхүү аянд нэгдэн мөнгөн болон эд материалын аливаа хандив өргөх, зохион байгуулалт, арга хэмжээнд оролцохыг хүссэн хүн бүрийг баяртай хүлээж авах болно.

Сайн үйлс бүхэн дэлгэрэх болтугай!

"БИД ҮҮРДИЙН НАЙЗУУД" сайн үйлсийн аян

Эргэн дурсахуй.

Тэр нэгэн өдрөөс хойш бид түүнгүйгээр, бас зүрх сэтгэл, нөхөрлөлдөө үргэлж түүнтэйгээр дөрвөн хаврыг үдэж, дөрвөн намрыг угтжээ. Тиймээ "Нөхөрлөл эхэлсэндээ биш, Найзалж яваад яаж дууссандаа".

Үүлэн чөлөөний наранд бүлээцэн дулаацах нас минь
Үнэн худлын хооронд бүдэгрэх дурсамж
Үгний сайханд хөөрсөн хиргүй гэгээн сэтгэл
Үүрд гэж амлаагүй ч зуурдхан байгаагүй

Нөхөрлөл эхэлсэндээ биш, Найзалж яваад яаж дууссандаа